25/1/08

III CONCEYU DEL TEXU

LLAMAU d'ABAMIA

III CONCEYU DEL TEXU

3 DE FEBRERU A LES 12 HORES

BAXO'L TEXU D'ABAMIA (CORAO - CANGUES D'ONÍS)


Por tercer vegada llamamos al Conceyu del Texu, al pie del Texu d'Abamia, en defensa d'esti patrimoniu de texos centenarios y monumentales que tienen un sen tán fondu pa los asturianos como árboles de xunta o conceyu. Ellos foron respetaos de magar los sieglos, y llantaos nel mesmu centru de cada pueblu yeren tou un símbolu llibertá ya identidá y democracia direuta qu'a los sos pies s'exercía dende tiempos inmemoriales. Ellos, que foron d'esti xeitu guardianos y proteutores de la tradición, testigos y santuarios d'entendimientu y alcuerdu ente los homes, necesiten güei del nuesu emparu. Más que nunca paez que ye mester defender a los que nun puen defendese por sí mesmos de les reiteráes agresiones que sufren nos últimos tiempos.

Por tercer vegada facemos llamáu al pie d'estos texos xabazmente agredíos na demanda d'una proteición de fechu y como enérxica protesta ente l'atentáu perpetráu poles mesmes alministraciones encargaes de la so guarda, que forciaren la normativa en vigor y xustificaren o minimizaren los estropicios que ficieren per tol campu d'Abamia.


Por tercer vegada aconceyamos el Conceyu del Texu, al pie del Texu d'Abamia pa que tou esti patrimoniu de texos de conceyu seya reconocíu d'una vez por toes y respetáu y pa que Abamia seya, na midía lo posible, devuelta al so vieyu ser, iguada y devuelta al so esllendor, a la sobriedá y autenticidá, al xacíu y la naturalidá que facíen d'esti santuariu un llugar únicu, enllenu d'espiritualidá, de significáu, d'equilibriu y de fuercia.

Por tercer vegada llamamos a Conceyu Abiertu pa defender el propiu raigañu, tarazáu llaceriosamente n'Abamia.

Convoquen:

Asociación Abamia, A.N.A (Asociación d'Amigos de la Naturaleza Asturiana),Fundación Belenos, Coordinadora Ecoloxista d'Asturies, Foru Arte Ciudá, Tertulia Cultural "El Garrapiellu", Amigos del Texu.

No hay comentarios: